Kryeministri i Shqipërisë, Edi Rama, ka qëndruar në Kosovë që nga dita e djeshme.
Pas një agjende me shumë aktivitete dhe pas mbledhjes së dy qeverive, Rama e ka përmbyllur vizitën e tij në Kosovë në takim me kryetarin e Partisë Demokratike të Kosovës, Memli Krasniqi.
I pari i PDK-së,Memli Krasniqi dhe kryeministri i Shqipërisë Edi Rama janë parë së bashku në qendër të Prishtinës, teksa po pinin kafe e diskutonin së bashku.
Duhet përkujtuar që Rama gjatë ditës së djeshme ka vizituar disa kompani prodhuese të Kosovës, e në mbrëmje qëndroi në Burojë të Skenderajt, ku ka vizituar familjen e ish-presidentit Hashim Thaçi.
Gjatë ditës së djeshme dhe sot, Rama gjatë tërë kohës është deklaruar për përkrahjen e tij ndaj ish-krerëve të UÇK-së të cilët po vazhdojnë të gjykohen në kuadër të Gjykatës Speciale në Hagë.
