E ardhmja e Jadon Sancho te Manchester United është drejt fundit. Anësori anglez nuk bën pjesë në planet e trajnerit të ri, Rúben Amorim, dhe është në kërkim të një klubi të ri ku mund të rifitojë formën dhe rëndësinë e dikurshme.
Paga e lartë e Sanchos është kthyer në barrë për klubin, i cili është i gatshëm ta largojë këtë verë për të liruar hapësirë në skuadër dhe për të investuar në përforcime të reja sulmuese.
Një nga opsionet kryesore për të është Juventusi. Klubi italian ka ndjekur situatën e lojtarit prej muajsh dhe raportohet se ka një marrëveshje në parim me Sanchon, i cili është i gatshëm të ulë ndjeshëm pagën për t’u transferuar në Torino.
Megjithatë, marrëveshja ende nuk është finalizuar. Juventusi po kërkon të reduktojë numrin e lojtarëve ofensivë përpara se të zyrtarizojë ndonjë afrim të ri. Largimi i Timothy Weah drejt Marseille mund të hapë rrugën për realizimin e këtij transferimi.
Në garë është futur fuqishëm edhe Borussia Dortmund. Klubi gjerman, ku Sancho kaloi vitet më të mira të karrierës së tij, ka nisur kontaktet me përfaqësuesit e tij dhe pritet të bëjë një ofertë zyrtare së shpejti.
Kthimi në Bundesliga, në një ambient të njohur dhe te një klub ku ai ndjeu vlerësim dhe stabilitet, është një opsion shumë tërheqës për lojtarin 24-vjeçar.
E ardhmja e Sanchos është larg Old Trafford dhe gjithçka tregon se largimi i tij mund të zyrtarizohet brenda pak ditësh. Beteja mes Juventusit dhe Dortmundit po hyn në fazën vendimtare.
