Avokati i Hashim Thaçit në Gjykatën Speciale të Hagës, Luka Misetiq, është shprehur i bindur në pafajësinë e klientit të tij.
Ai ka bërë me dije se prokuroria nuk ka prova kundër ish-presidentit të Kosovës.
Në një intervistë nga Haga për Nacionalen dhe media të tjera të Kosovës, Misetiq ka thënë se provat e Prokurorisë kundër Thaçit, janë tejet të dobëta.
Ai ka treguar se akuzat që nisën me raportimin e Dick Martyt, nuk kanë asnjë lidhje me provat e paraqitura ndaj Thaçit në këtë gjykim.
“Mendoj se ky rast dhe provat kundër Z. Thaçi kanë qenë shumë të dobëta. Nuk mund të flas për provat tani por mendoj se në fund të gjykimit do të shihni se pretendimet që nisën me raportin e Martyt nuk kanë thuajse asnjë lidhje me provat e paraqitura kundër Thaçit në këtë gjykim mbi 2 vjet. Në këtë kuptim jam shumë optimist për rezultatin që del nga ky rast, për z. Thaçi, mendoj se provat kanë qenë shumë të dobëta dhe patjetër se do t’i argumentojmë këto para Trupit Gjykues në kohën e duhur”, tha avokati Misetiq, raporton Nacionale.
Ai disa herë me radhë i, vuri theksin te fakti që ish-krerët e UÇK-së për më shumë se 4 vjet e gjysmë janë në paraburgim.
“Më lejoni të them se klientët tanë janë mbajtur në paraburgim për një kohë jashtëzakonisht të gjatë, 4 vjet e gjysmë në paraburgim, 4 vjet e gjysmë të cilat nuk mund t’i kthejnë kurrë mbrapa. Jam i zhgënjyer që u deshën 2 vjet e gjysmë që çështja e Prokurorisë të përfundonte, besoj se kjo çështje mund të përfundonte shumë më shpejt por jemi ku jemi tani”, tha ai më tutje.
Avokati i njohur Misetiq, tha se ka pasur raste kur gjatë gjykimit e ka pyetur veten “pse është akuzuar Hashim Thaçi”.
Sipas tij, nuk ka prova që mund ta dënojnë klientin e tij.
“Për mendimin tonë provat kundër z. Thaçi janë jashtëzakonisht të dobëta deri në atë pikë që nganjëherë gjatë procesit e kam pyetur veten “pse është akuzuar Z. Thaçi?”. Do t’i dorëzojmë parashtresat tona Trupit Gjykues në kohën e duhur por nuk ka shumë gjëra që mund të them për prova specifike të rastit, por jemi të bindur për rezultatin për Z. Thaçi dhe e vetmja gjë që ka mbetur tani është të kalojmë nëpër fazat tjera të procesit sa më shpejt dhe ta kemi aktgjykimin sa më parë të jetë e mundur”, tha Misetiq më tutje
