Edhe pse sezoni veror ka kaluar kulmin, plazhi i Durrësit vijon të frekuentohet nga dhjetëra pushues vendas dhe të huaj.
Kjo periudhë e vitit sjell një atmosferë më të qetë, larg zhurmës dhe fluksit të madh të gushtit, duke e kthyer bregdetin në një vend ideal për pushime relaksuese.
Dy prej pushuesve që ndodheshin sot në plazh u shprehën të kënaqur me kushtet që ofron Durrësi në këtë kohë.
Një pushues nga Kosova thotë se tani është gjithçka e rregullt, çmimet janë të arsyeshme dhe atmosfera është shumë e këndshme.
“Është shumë më qetë, më pak njerëz dhe mund të shijosh detin pa rrëmujën e muajve të verës”, tha një prej tyre.
Një tjetër pushues theksoi se pastërtia dhe çmimet e shërbimeve janë arsye të tjera pse ia vlen të zgjidhësh Durrësin për pushime në shtator.
Plazhi i Durrësit mbetet kështu një destinacion i preferuar jo vetëm gjatë muajve të verës, por edhe në fillim të vjeshtës, duke ofruar relaks, shërbime cilësore dhe një det të pastër për vizitorët./Vizion+/
