Dua Lipa dhe i fejuari i saj, aktori britanik Callum Turner, u panë të qeshur dhe plot dashuri gjatë një daljeje mbrëmjeje në festën e dëgjimit të albumit të ri të Rosalías, “LUX”, të mbajtur të shtunën në New York City.
Këngëtarja 30-vjeçare dhe aktori 35-vjeçar i serialit Eternity – të cilët njoftuan fejesën e tyre në qershor – u panë të lidhur për krahu teksa dilnin nga The Weyline në Brooklyn, shkruan DailyMail.
Dua Lipa mahniti me një pallto të gjatë me dizajn gjarpri, të kombinuar me një veshje të zezë elegante dhe çizme në të njëjtën ngjyrë. Flokët e errët i kishte lënë të lira, ndërsa pamjen e plotësoi me vathë të artë, të mëdhenj dhe tërheqës.
Ndërkohë, Callum kishte zgjedhur një stil të ftohtë e urban, me një xhaketë lëkure të zezë mbi një triko dhe pantallona po ashtu të zeza, duke e përfunduar pamjen me atlete tie-dye. Çifti u largua nga lokali i kapur për krahu, duke shkëmbyer buzëqeshje të sinqerta.
Në një intervistë të fundit për The Times, Callum ka treguar se takimi i tyre i parë mund të mos kishte ndodhur fare, pasi disa herë kishin qenë “në prag” të takoheshin, por pa u ndeshur kurrë.
“Kishim dy, tre, ndoshta pesë raste kur gati u takuam, por nuk ndodhi,” tregoi ai. “Kishim miq të përbashkët, frekuentonim të njëjtat vende. Njëherë ajo shkoi në një festë dhe unë arrita vetëm 15 minuta pasi ajo kishte ikur. Ajo doli në orën 1:45 të mëngjesit, unë mbërrita në 2:00. Ishim aq afër”.
Ai shtoi me humor: “Pastaj, kur më në fund u gjetëm në të njëjtën kohë, të dy ishim beqarë… dhe thjesht mendova se ajo ishte gruaja më e bukur në botë”.
Ylli i serialit Masters of the Air kujtoi se lidhja e tyre nisi gjatë një mbrëmjeje për ditëlindjen e një miku të përbashkët, ku rastësisht zbuluan se të dy po lexonin të njëjtin libër — romanin Trust nga Hernan Diaz. “Nëse do ta ktheje në film, ajo do të ishte skena kur shikoj nga qielli dhe them: ‘E mora shenjën’. Ajo ishte momenti i parë”, tha Callum.
Dua Lipa ndodhet aktualisht në turneun e saj botëror “Radical Optimism Tour”, në fazën amerikane që do të përfundojë në dhjetor.
Kur u pyet për sfidat e një lidhjeje në distancë dhe planet për dasmën, Callum tha se çifti e ka gjetur ekuilibrin perfekt: “FaceTime është një gjë e mrekullueshme,” tha ai me humor. “Rregulli ynë është: kurrë nuk ia vlen të mos e bësh. Nëse ke mundësi të jesh me të për dy ditë — vetëm shko! Edhe nëse je i lodhur, s’ka rëndësi. Do kalosh mirë dhe do krijosh kujtime të bukura”.
Ai shtoi se për të, dashuria e vërtetë është një kombinim i gjërave të vogla dhe të mëdha: “Dashuria e vërtetë është vazhdimësi, është e përbërë nga momentet, jo nga një gjest i madh romantik. Është një përzierje e vogël e çdo gjëje – dhe mendoj se kjo është ajo që e bën të vërtetë”.
Në një intervistë për British Vogue gjatë verës, Dua Lipa konfirmoi fejesën e tyre, duke e përshkruar si “një ndjenjë të veçantë dhe emocionuese”: “Është shumë emocionuese. Kjo ide për të u rritur bashkë, për të ndarë jetën, për të qenë miqtë më të mirë përgjithmonë — është një ndjesi vërtet e veçantë”.
Në një tjetër intervistë për Harper’s Bazaar në gusht, këngëtarja u shpreh se është dashuruar “thellësisht” me Callum dhe se është gati të jetë e ndjeshme emocionalisht, pavarësisht frikës që sjell kjo ndjenjë.
“E dua dashurinë. Është diçka e bukur dhe frymëzuese,” tha ajo. “Ajo ndjesi e rënies në dashuri është e fortë, por edhe e frikshme. Megjithatë, ndihem me fat që mund ta përjetoj”.
Ajo shtoi: “Për një kohë të gjatë kam qenë e rezervuar, duke mbrojtur zemrën time. Por tani po e lë veten të lirë. Nëse duhet të lëndohem, le të ndodhë — unë dua ta përjetoj dashurinë plotësisht”.
Kur u pyet përse po flet publikisht për marrëdhënien e saj, Dua u përgjigj: “Jam më e lumtur se kurrë. Do të ishte e padrejtë të mos flisja për këtë. Kur je person publik, çdo gjë personale është e brishtë, por kjo nuk do të thotë që nuk dua ta ndaj”. /Telegrafi/
