UEFA ka hedhur shortin e fazës play-off të Ligës së Konferencës, ku dy përfaqësuese shqiptare nga Kosova dhe Maqedonia e Veriut kanë mësuar kundërshtarët e tyre në rrugëtimin drejt fazës së 1/8 së finales.
Drita do të përballet me skuadrën sllovene Celje, në një duel që pritet të jetë mjaft i fortë dhe i balancuar.
Kampionët e Kosovës synojnë të vazhdojnë paraqitjet pozitive në arenën evropiane dhe të shfrytëzojnë përvojën e fituar në vitet e fundit për të kaluar këtë pengesë të rëndësishme. Gjilanasit arritën ta shmangnin AZ Alkmaarin në këtë short
Ndërkohë, Shkëndija do të ketë një sfidë edhe më të vështirë, pasi shorti e ka vënë përballë ekipit turk Samsunspor.
Kuqezinjtë nga Tetova do të kërkojnë të befasojnë një kundërshtar me buxhet dhe emër më të madh, duke u mbështetur në organizimin dhe përvojën e tyre në garat evropiane.
Ndeshjet e play-offit të Ligës së Konferencës do të zhvillohen me sistem vajtje-ardhje, ndërsa fituesit do të sigurojnë kualifikimin në fazën e 1/8 së finales të kësaj gare.
Për Dritën dhe Shkëndijën, këto përballje përfaqësojnë një mundësi të artë për të shkruar një tjetër kapitull të rëndësishëm në historinë e tyre evropiane.
