Mungesa e konstituimit të Kuvendit ka detyruar Albin Kurtin të zbusë qëndrimet e tij dhe t’i lutet LDK për bashkëqeverisje. Një letër e tillë nuk ka marrë ende përgjigjen e kreut të LDK, Lumir Abdixhiku.
Analistja Maliqi theksoi se letra e Kurtit nuk është letër e sinqertë, por e imponuar nga halli, që ka mbi supe.
“Jemi në një situatë, që ka qenë tentativa e 11 për të zgjedhur kryeparlamentarin dhe nuk kanë arritur të zgjedhin pasi Vetëvendosje qëndron në pozitat e veta pasi është po i njëjti emër. Kjo është hera e tretë që i ka dërguar letër, në letrën e dytë, ka qenë krijimi i institucioneve dhe letra e tretë është lutja për të pasur një koalicion. Nuk është letër e sinqertë, por është letër e bërë nga zori”, tha Maliqi.
Ajo theksoi se Lidhja Demokratike e Kosovës nuk duhet të pranojë ftesën e Albin Kurtit, sepse kjo do kishte kosto elektorale të madhe për të.
“LDK dy herë e ka refuzuar, nuk ka pranuar as të shkojë në takim. Mendoj se LDK duhet të qëndrojë në pozitat e veta dhe nuk duhet t’i shkojë në takim a të pranojë ndonjë koalicion, sepse e dëmton veten në të ardhmen. Nuk kanë traditë të mirë në të kaluarën e tyre”, u shpreh ajo
Sipas saj, Kosova nuk e ka luksin të shkojë në zgjedhje të parakohshme, por duhet të ketë një qeverie, pjesë e së cilës të jenë partitë opozitare si LDK, PD, AAK dhe Nisma.
“Nuk e kemi luksin që vendi të shkojë në zgjedhje të parakohshme, sepse në zgjedhje mund të ketë ndryshime në përqindje të vogël. Kjo e dëmton ekonominë pasi nën qeverisjen e Kurtit kemi patur regres në fushën ekonomike”, theksoi Maliqi.
