Rreth 40 për qind e njerëzve që jetojnë me diabet në mbarë botën mbeten të padiagnostikuar, sipas një studimi.
Shumica e njerëzve që nuk janë diagnostikuar jetojnë në Afrikë (60 për qind), e ndjekur nga Azia juglindore me 57 për qind dhe rajoni perëndimor i Paqësorit me 56 për qind, thotë përmbledhja e industrisë globale të diabetit 2023, hulumtimi më i madh i kryer ndonjëherë i këtij lloji.
Gjysma e atyre që janë diagnostikuar nuk marrin trajtim, thuhet në raport dhe tre persona në katër persona me këtë sëmundje jetojnë në vende me të ardhura të ulëta dhe të mesme ku njerëzit nuk mund të kenë gjithmonë akses në shërbimet e kujdesit shëndetësor, raporton The Guardian.
Por studiuesja e raportit, Sasha Korogodski, tha se më shumë se 530 kompani u zbuluan se ishin të specializuara në diagnostikimin e diabetit në mbarë botën, por vetëm 33 ishin në Afrikë, Azinë Juglindore dhe Paqësorin Perëndimor.
“Infrastruktura e kufizuar e kujdesit shëndetësor, duke përfshirë mungesën e profesionistëve të kujdesit shëndetësor dhe pajisjeve diagnostikuese, mund të pengojë diagnostikimin e hershëm të diabetit”, tha Korogodski.
Hulumtimi, i publikuar të enjten, shikon më shumë se 2,800 kompani, 1,500 investitorë dhe 80 qendra kërkimore dhe zhvillimi të fokusuara në këtë gjendje.
Ndërsa shefja ekzekutive e Amref Health Innovations, Caroline Mbindyo, pjesë e OJQ-së Amref Health Africa, tha se gjysma e të gjithë afrikanëve nuk kanë akses në kujdesin shëndetësor që u nevojitet.
Në vitin 2021, gati 7 milionë vdekje në mbarë botën ishin si pasojë e diabetit pavarësisht nga më shumë se 970 miliardë dollarë të shpenzuara për trajtim, sipas hulumtimit.
