Presidenti ukrainas Volodymyr Zelensky u takua të shtunën në Vatikan me Papa Françeskun, i cili ka thënë në fund të prillit se Selia e Shenjtë është e përfshirë në një mision paqeje për t’i dhënë fund luftës me Rusinë.
“Është një nder i madh”, ka thënë Zelensky gjatë takimit, duke vënë dorën në zemër dhe duke përkulur kokën ndërsa përshëndeti Papën 86-vjeçar, i cili po qëndronte në këmbë.
Më herët të shtunën, Zelensky u takua gjithashtu me kryeministren italiane Giorgia Meloni, e cila premtoi mbështetje të plotë ushtarake dhe financiare për Ukrainën dhe përsëriti mbështetjen për t’u bërë anëtare e BE-së.
Zelensky u takua për herë të fundit me Papën në Vatikan në vitin 2020 dhe ata kanë folur disa herë me telefon që nga fillimi i luftës.
Në fillim të luftës, Papa u përpoq të merrte një qasje të ekuilibruar, por më vonë filloi të dënonte ashpër veprimet e Rusisë, duke i krahasuar ato me disa nga krimet më të këqija kundër Ukrainës gjatë epokës sovjetike.
