Përballja e Ligës Premier mes Chelsea dhe Arsenal në javën e 13-të, e zhvilluar në stadiumin “Stamford Bridge”, ka ofruar shumë emocione, tension dhe vendime kontestuese nga gjyqtari.
Ndeshja nisi me intensitet të lartë dhe raste të rrezikshme për të dyja skuadrat. Në minutat e para, Bukayo Saka provoi një goditje nga jashtë zone, por portieri Robert Sanchez reagoi me një pritje të lehtë.
Arsenal po përpiqej të merrte kontrollin e lojës, por ndërhyrjet e forta dhe kartonët e verdhë nuk munguan. Martin Zubimendi, Cristhian Mosquera, dhe Riccardo Calafiori u ndëshkuan me karton të verdhë për faulle të ndryshme te Arsenali.
Momenti më i diskutueshëm erdhi në minutën e 37-të, kur Moises Caicedo i Chelseat kreu një ndërhyrje të ashpër. Fillimisht gjyqtari Anthony Taylor e ndëshkoi me karton të verdhë, por pas verifikimit me VAR, ai anuloi verdiktin dhe e dërgoi Caicedon jashtë fushës me karton të kuq.
Ky moment ndryshoi ndjeshëm ekuilibrin e ndeshjes, duke lënë Chelsean me një lojtar më pak për pjesën e mbetur të ndeshjes.
Chelsea kaloi në avantazh në minutën e 48-të me një gol të Trevoh Chalobah, i cili shënoi me kokë pas një krosimi nga këndi.
Megjithatë, Arsenal nuk u dorëzua dhe reagoi shpejt në pjesën e dytë. Në minutën e 59-të, Mikel Merino barazoi rezultatin në 1-1 me një goditje me kokë të saktë pas një krosimi perfekt nga Bukayo Saka, duke i dhënë Arsenalit një pikë të vlefshme si mysafir.
Arsenali mbetet lider me 30 pikë, ndërsa Chelsea i katërti me 24 pikë. /Telegrafi/
