Deputetja e Partisë Demokratike të Kosovës (PDK), Blerta Deliu-Kodra, ka thënë të martën se Albin Kurti dhe Lëvizja Vetëvendosje (LV) për vite më radhë “kanë terrorizuar institucionet dhe shoqërinë”, për marrëveshjet me Serbinë që i cilësonin “tradhti”, ndërsa tani po i nënshkruajnë ato – po të njëjtat.
“Të njëjtat marrëveshje për energjinë, Vetëvendosje dikur i propagandonte si ‘akte tradhtie e nënshtrimi ndaj Serbisë’ si dhe marrëveshje që fusnin operatorin e Serbisë (‘Elektrosever’) në Kosovë duke dezintegruar sistemin energjetik të Kosovës”, ka shkruar Deliu-Kodra në llogarinë e vet në Facebook.
Postimi i plotë:
Vetëvendosje që kishte ndërtuar kauzë politike duke demonizuar çdo marrëveshje me Serbinë të lehtësuar nga BE-ja dhe mbështetur nga SHBA-të, sot në pushtet u dakorduan për implementimin e marrëveshjeve të njejta, duke i cilësuar si të arritura.
Të njejtat marrëveshje për energjinë, Vetëvendosje dikur i propagandonte si “akte tradhtie e nënshtrimi ndaj Serbisë” si dhe marrëveshje që fusnin operatorin e Serbisë (Elektrosever) në Kosovë duke dezintegruar sistemin energjetik të Kosovës.
Me këtë narrativë Kurti me partinë e tij, për vjet me radhë terrorizoi institucionet dhe një shoqëri të tërë. Sot, pikë për presje Vetëvendosje po ju referohet marrëveshjeve të kaluara, duke i mbështetur ato pa asnjë ndryshim.
