Deputetja e Aleancës për Ardhmërinë e Kosovës, Albana Bytyqi, ka reaguar lidhur me ndarjen e mjeteve nga Qeveria për t’ua siguruar librat nxënësve nga klasa e parë deri të pestën.
Ajo ka shkruar se Lëvizja Vetëvendosje anuloi tenderin për furnizim me libra nga shtëpitë botuese me arsyetimin se janë tejkaluar 500 mijë euro nga vlera e parashikuar, ndërsa tash kanë ndarë 6 milionë euro, përmes praktikës së re të subvencionimit të prindërve.
“Të qeshim të gjithë së bashku”, ka shkruar ndër të tjera.
Zyra për Media e Kryeministrisë ka njoftuar se sot Qeveria e Kosovës ka zhvilluar një mbledhje në mënyrë elektronike duke marrë vendim për ndarjen e 6 milionë e 323 mijë e 380 euro për subvencionimin e teksteve shkollore për klasat 1 deri 5 dhe 6 milionë e 617 mijë e 340 euro për subvencionimin e materialeve mësimore për klasat 1 deri 9.
