Altin Krasniqi, deputet i Partisë Demokratike të Kosovës, pas dështimit të 42-të me radhë të seancës konstitutive të Kuvendit të Kosovës, tha se vendi ka mbetur “peng i një emri” me Lëvizjen Vetëvendosje që as s’i ka numrat dhe as bën kompromis.
Krasniqi tha se për zhbllokim të situatës kryesuesi i seancës konstitutive që ka përmbysur të gjithë procedurën – e konstatuar nga Gjykata Kushtetuese – duhet të kthehet në rend të ditës.
Postimi i Krasniqit:
Pasi ka dështuar ta sigurojë shumicën në 42 seanca radhazi, tani thotë se përgjegjësia për konstituimin e Kuvendit është e përbashkët. Mirëpo, nëse me të vërtetë është përgjegjësi e të gjithëve, atëherë duhet të uleni e të bëni kompromis, jo të vazhdoni me imponim!
Tha se Kryetari dhe Nënkryetarët janë “paketë”, por kjo nuk është e vërtetë, janë dy pika të ndara në rendin e ditës, ashtu siç parashihet edhe në Rregulloren e Kuvendit.
Kryetari i Kuvendit është përfaqësues i të gjithë deputetëve, jo i një subjekti të vetëm. Nëse partia e parë nuk i ka votat për kandidatin e vet, atëherë ka vetëm një rrugë: kompromisi, të propozojë një emër që mund të marrë mbështetjen e nevojshme për t’u zgjedhur.
Ndërkohë, nënkryetarët janë përfaqësues të subjekteve parlamentare, dhe nuk kushtëzohen me zgjedhjen e kryetarit.
Nëse vërtet dëshironi të zhbllokohet procesi, kaloni në rend të ditës, respektoni Kushtetutën, ndërroni kandidaten.
Shteti nuk mund të mbahet peng i një emri!
