450 metra hekurudhë janë përfshirë nga zjarri të premten në fshatin Radoste të Rahovecit, ku bëhet e ditur se në këtë sipërfaqe janë përfshirë njëzet traversa të hekurudhës.
Klan Kosova ka raportuar se dikush dyshohet se ndezi barin që pothuajse e ka mbuluar rrugën e trenit, duke i shkrumbuar edhe drunjtë e binarëve.
Kjo pjesë e hedhurave tashmë është jashtë funksionit, mirëpo nga ana tjetër ndërmarrja Infrakos e ka një rojtar i cili e mbikëqyr gjendjen e hekurudhës në këtë anë, dhe po i njëjti kishte vërejtur zjarrin e i kishte lajmëruar organet kompetente.
Mediumi ka biseduar edhe zëdhënësin e Infraksoit, Rafet Çitaku, i cili ka bërë të ditur se linja është jashtë funksionit dhe nëse do të vendoseshin në funksion traversat si përforcim i trupit hekurudhor, është dashtë që të ndërrohen.
“Kjo linjë është jashtë funksionit dhe nëse do të vendoseshin në funksion traversat si përforcim i trupit hekurudhor, është dashtë që të ndërrohen, për shkak të amortizimit të tyre.” – deklaroi Çitaku.
Ndër të tjera, vlera konkrete e djegies do të dihet gjatë javës nga raporti i komisionit vlerësues të Infrakosit-it.
Gjithashtu, raportohet se organet e rendit kanë nisur hetimet dhe ende nuk ka të dyshuar.
