Deputetja e PDK-së, Blerta Deliu-Kodra, e ka vlerësuar si të çuditshme ftesën për vazhdimin e seancës së sotme në ora 20:00.
Ajo ka bërë me dije se caktimi për seancës është bërë pa përfunduar ende kontrollet në Kuvendin e Kosovës.
“Pa dashur të hyjmë në spekulime, por ftesa për seancë në orën 20:00 është, të paktën, e çuditshme. Kontrolli në Kuvend pas alarmit për bombë ende nuk ka përfunduar. Nuk ka asnjë deklaratë zyrtare nga Policia. E megjithatë, dërgohet ftesa për seancë – sikur gjithçka është në rregull. Si po e di kryesuesi se ambientet janë të sigurta dhe se puna mund të vazhdojë pa asnjë pengesë? P.S. Edhe në këto momente, ndërsa po e bëj këtë postim, Policia ende po i kontrollon hapësirat e Kuvendit”, ka shkruar ajo në profilin e saj në “Facebook”.
