Rrëzimi i ligjit për Këshillin Prokurorial të Kosovës nga Gjykata Kushtetuese dhe akuzat e ministres së drejtësisë Albulena Haxhiu ndaj institucionit themeltar të demokracisë në vend, pra Gjykatës Kushtetuese, kanë qenë shtysë e përplasjes mes deputetes së PDK-së Blerta Deliu dhe ministres Haxhiu.
Derisa Deliu akuzoi qeverinë për autoritarizëm, ajo pyeti Kurtin se a janë ‘super kriminelë’ minsitrat e tij që po e shkelin Kushtetutën.
“E keni ndrydhur e shtrydhur drejtësinë për interesa tuaja personale. Me qeverinë Kurti nuk do të ndodhë kështu sepse sistemi i drejtësisë do të jetë transparent e llogaridhënës.
Është lajm i keq rrëzimi për KPK-në. Qytetarët janë të etur për drejtësi.
Aktgjykimi prandaj është lajm i keq për qytetarët. Është i mirë vetëm për ju sepse keni përgjegjësi dhe për grupet e interesit që ia kanë zënë frymën sistemit të drejtësisë.
Po unë do të komentoj vendimet e Gjykatës Kushtetutës”, tha Haxhiu.
Sërish reagoi deputetja Deliu, duke thënë se duke provuar që të ‘mbrojnë sundimtarin Kurti’, Haxhiu po sulmon demokracinë e vendit.
“Ky shtet nuk do shndërrohet në shtet autoritar. Sado që ju synoni për t’ia dhënë pushtetin sundimtarit Kurti.
Edhe kjo që ju po bëni, është atak i drejtpërdrejtë ndaj demokracisë.
Kjo nuk do të duhej të ndodhte, një ministre që sulmon institucionet e drejtësisë nuk do të duhej të kishte vend këtu.
Ju po folni për drejtësi e unë kam një pyetje për kryeministrin Kurti, a janë super kriminelë ministrat tuaj që po shkelin Kushtetutën”, tha ajo.
