Një aeroplan udhëtarësh me 64 persona brenda tij u përplas natën me një helikopter ushtarak afër aeroportit “Reagan” në Uashington të Shteteve të Bashkuara. Dyshohet për dhjetëra viktima.
Në internet janë publikuar pamjet e para të përplasjes.
Nga largësia shihet një dritë më e fortë, mësa duket e aeroplanit të udhëtarëve, si dhe një dritë më e dobët teksa i afrohet asaj, me gjasë e helikopterit ushtarak.
Pas pak sekondave shihet një shpërthim i madh në ajër dhe rënia e aeroplanit dhe helikopterit në tokë.
Kompania “American Airlines” ka konfirmuar se në aeroplan ndodheshin 60 pasagjerë e katër anëtarë ekuipazhi.
Një zyrtar amerikan ka thënë se në helikopterin ushtarak ndodheshin tre ushtarë.
Presidenti amerikan, Donald Trump, tha se përplasja mes aeroplanit dhe helikopterit të ushtrisë amerikane afër Uashingtonit “është dashur të parandalohej”.
“Pse nuk i tregoi kulla e kontrollit helikopterit se çfarë të bënte, në vend se ta pyeste nëse po e shihte aeroplanin? Kjo është një situatë e keqe që duket sikur do të duhej të parandalohej. JO MIRË” – shkroi kreu i Shtëpisë së Bardhë në rrjetin social “Truth Social”.
