Daut Haradinaj ka uruar festën e 28 nëntorit mbarë kombit shqiptar. Këtij postimi, ai ia ka bashkëngjitur një fotografi të pikturës së Rexhep Selimit, shokut të luftës që e kishte përkrah gjatë daljes së parë publike të UÇK-së.
“Me këtë pikturë të Rexhës nga burgu, i them që të jam në krah, sikur atëherë dhe tash, e çdoherë. Saherë që gjykohet liria, për ty dhe të tjerët bashkëluftëtarë që janë me ty atje”, tha Haradinaj.
Postimi i plotë:
25 vjet më parë, në ditën kur lartësohej mësuesi Halit Geci, festuam ndryshe, në vallen e nisur për çlirim, krah Rexhës që sot po i jep vulën e pastërtisë UÇK-së dhe Mujës që sot qëndron mbi çdo shkronjë të historisë.
Nëntorët na kaplojnë me emocione, se nuk ka ditë që nuk ngjallin festë e krenari, dhimbje e gëzim. Figura të panumërta heronjsh ndër shekuj, duket sikur ky muaj është omeni i mirë i kombit tonë.
Urime ditëlindjen Komandant Adem Jashari, Urime UÇK-së, urime të gjithë brezave që nuk kursyen asgjë nën flamurin kuq e zi. Shqipëria dhe Kosova janë dhe do të bëhen ashtu sikur e ëndërruan heronjtë.
Me këtë pikturë të Rexhës nga burgu, i them që të jam në krah, sikur atëherë dhe tash, e çdoherë. Saherë që gjykohet liria, për ty dhe të tjerët bashkëluftëtarë që janë me ty atje.
Urime 28 Nëntori! 🇦🇱
