Kandidati për deputet nga AAK-ja, Daut Haradinaj, ishte pjesë e tubimit me rininë në Deçan.
Haradinaj fjalimin e tij e nisi me falënderime e duke thirrur ‘’UÇK’’.
Ai përmendi faktin kur kryeministri Kurti, luftëtarët i quajti banditë e që sipas tij, banditi i vetëm është ai që ia fali tokën e Manastirit të Deçanit, Sava Janjiqit.
‘’Deçani, qysh në vitet e hershme të 1998, i nisi përpjekjet për liri dhe në atë kohë në krye të përpjekjeve ishte Jusuf Gërvalla dhe dje i ka bërë 44 vite që është vrarë në një atentat. Poashtu nën frymën e asaj lëvizje, 89-90, ishte rezistenca e Deçanit dhe e gjithë Kosovës ku më vonë burojë edhe Ushtria Çlirimtare e Kosovës e ku Deçani, me nderë e krenari e mbajti flamurin e brigadës 131 Jusuf Gërvalla. Nën atë flamur i kemi sot më shumë se 300 dëshmorë, i kemi sot më shumë se 700 invalid të luftës, i kemi sot më shumë se 7.000 veteranë jo vetëm të komunës sonë por të rajonit e më gjerë. Pikërisht ajo të cilën e kemi kursyer 4 vitet shkoi në Pejën e bashkuar dhe i ofendoi pikërisht këto vlera kombëtare. Luftëtarët e lirisë që nuk e lanë Pejën si Mitrovicën të ndarë por që e bashkuan Pejën, i ofendoi me termin më të rëndë i quajti banditë. Pikërisht ajo që i quajti banditë luftëtarët e lirisë, në natën vonë, pesë minuta pa u bërë 12:00, para tre muajsh, ia fali Manastrit të Deçanit, 24 hektarë tokë dhe kjo është banditja që e dëmtoi më së shumti komunën tonë, nuk janë luftëtarët e lirisë. Ia fali Manastirit pa asnjë kompensim në komunën tonë”, tha Haradinaj.
‘’Për 25 vite kemi rezitstu me të gjitha mjetet, kemi protestu, kemi mbajtë greva, kemi bërë referendume lokale, kemi mbledh nënshkrime e peticione për me e kundërshtu këtë vendim të padrejtë dhe pikërisht kjo që sot i ofendon luftëtarët e lirisë në Dukagjin, e nënshkroi dhe ia fali Sava Janjiqit tokën e pasurinë e Deçanit. Prandaj juve këtu që jeni prezentë po iu them se nëse ka banditë, kryebanditi është ajo me sejmentë e saj.’’, tha Haradinaj.
Ndër të tjera, Davidi i UÇK-së, i përmendi të gjitha vendimet e anuluara të Kurtit që lidheshin me komunën e Deçanit.
‘’Para 4 viteve kemi pasë një fushatë shumë agresive në Dukagjin, shumica prej tyre kanë qenë goditjet më të ulëta, kanë ofruar parajsën për Dukagjinin, por në vendimin e parë që e ka marrë Qeveria Kurti, ka qenë anulimi i taksës 100% ndaj Serbisë, vendimin e dytë që e ka marrë kjo Qeveri, ka qenë anulimi i autostradës ‘’Dukagjini’’, vendimi i tretë që e ka marrë kjo Qeveri ka qenë anulimi i rrugës Deçan-Plavë, që është arteria kryesore që e lidh kombin tonë me malësorët e Malit të Zi. Prandaj, sot iu ftoj që me datën 9 shkurt, rini e Deçanit sa jeni prezentë sepse gjithmonë rinia i bën revolucionet e mëdha, bashkohuni rreth numrit 137 dhe t’ia japim kartonin e kuq kryeministrit Kurti dhe atyre që vijnë e ofendojnë këtë shoqëri. Nuk ka vend për mashtrues në Kosovë e aq më pak në Deçan.
Për fund ai tha se ‘’meqenëse UÇK-ja është krenaria jonë kombëtare e historike, e di që shumë padrejtësi iu kanë bërë tash e 25 vite, veteranëve, invalidëve e familjeve të dëshmorëve dhe e di që ky status ka me ndërru shumë shpejt, për këtë arsye edhe vlerat kombëtare i keni në numër 137 sepse pikërisht aty, i vetmi lider i UÇK-së është prijësi i kësaj liste’’.
