Oda Ekonomike e Kosovës ka njoftuar për aktgjykimin e tretë nga Gjykata Komerciale e Kosovës, i cili anulon njoftimin e ZRrE-së për daljen në tregun e lirë të energjisë.
Sipas OEK-ut, ky zhvillim konfirmon se bizneset kishin të drejtë kur ngritën zërin kundër padrejtësive të ZRrE-së.
“Me vendimin e parë të Gjykatës komerciale u dëshmua se e drejta është në anën e bizneseve, mirëpo vendimet tjera janë duke e përforcuar të drejtën e bizneseve të Kosovës.
Konsiderojmë se tanimë ka mjaftueshem fakte që ZRRE të reflektoj dhe me këtë bëjmë thirrje ZRrE-së që ta pezullojë menjëherë njoftimin për daljen në tregun e lirë, përpara se të krijohen pasoja edhe më të rënda për biznesin, sidomos ndikimin negativ në konkurrueshmërinë e tregut, sepse tanimë ka biznese që ndikohen nga njoftimi, por që nuk kanë vendim nga Gjykata Komerciale e Kosovës”, thuhet në një njoftim të kësaj ode, transmeton Klankosova.tv.
Oda Ekonomike e Kosovës inkurajon të gjitha bizneset që ndihen të dëmtuara nga ky vendim të ndjekin rrugën ligjore për të mbrojtur interesat e tyre.
Për ata që kanë nevojë për asistencë juridike, OEK tregon se ka themeluar një ekip juristësh i cili po ndihmon bizneset e prekura nga vendimi i ZRRE në përpilimin e akteve juridike kundër njoftimit të ZRrE-së.
