Cristiano Ronaldo ka pranuar se do të pensionohet nga futbolli “së shpejti”, duke theksuar se do të jetë e vështirë t’i japë fund një karriere kaq të pasur.
Sulmuesi i Al Nassr, 40 vjeç, është golashënuesi më i madh i të gjitha kohërave me 952 gola për klubet dhe kombëtaren.
Ai tha muajin e kaluar se synonte të arrinte 1,000 gola para se të largohej nga fusha.
“Së shpejti,” u përgjigj pesë herë fituesi i Topit të Artë, kur u pyet se kur do të varte këpucët.
“Do të jetë shumë, shumë e vështirë, por kam përgatitur të ardhmen time që kur isha 25-27 vjeç. Do të jem i gatshëm të përballoj këtë presion. Nuk ka asgjë që krahasohet me adrenalinin e golit në futboll. Por çdo gjë ka një fillim dhe një fund. Do të kem më shumë kohë për veten, familjen dhe për rritjen e fëmijëve të mi.”
Ronaldo tha gjithashtu se ndjek ende rezultatet e Manchester United, pavarësisht se përfundoi në mënyrë të pakënaqshme rikthimin e tij të dytë te klubi tre vjet më parë. United përjetoi sezonin e fundit më të dobët në elitë që nga rënia në ligën e parë në 1973-74, duke u renditur i 15-ti.
“Jam i trishtuar, sepse ky është një nga klubet më të rëndësishme në botë dhe gjithmonë do ta kem në zemër. Nuk kanë një strukturë të fortë. Shpresoj që kjo të ndryshojë tani dhe në të ardhmen, sepse potenciali i klubit është i jashtëzakonshëm,” tha Ronaldo.
Ai shtoi se problemi nuk është vetëm te trajneri dhe lojtarët, duke u referuar tek menaxheri Ruben Amorim: “Ai po bën më të mirën e tij. Çfarë mund të bësh? Mrekulli nuk ka.”
