Ish-trajneri i Tottenhamit, Harry Redknapp i ka ofruar shërbimet e tij klubit londinez, me Antonio Conte që është gjithmonë më pranë shkarkimit.
Vazhdimisht thuhet se Daniel Levy është i përgatitur të shkarkojë Conten gjatë periudhës së ndeshjeve të kombëtareve këtë javë.
Italiani ka kritikuar lojtarët e tij, si dhe pronarët e Tottenhamit, pas barazimit 3:3 të ekipit të tij me Southamptonin në fundjavë, raporton “Daily Mail”.
Akuzat e ashpra të Contes, për të cilin klubi më vonë këmbënguli se kishte për qëllim vetëm lojtarët e Tottenhamit dhe jo pronarët, mund ta bënte atë të humbiste punën.
Mbetet për t’u parë nëse ka një plan për të emëruar një pasardhës së Contes, ose nëse Ryan Mason do të emërohet si trajner i përkohshëm.
Ish-mesfushori i Tottenhamit, Mason mori drejtimin e klubit në finalen e Carabao Cup të vitit 2021, ku skuadra e tij u mposht nga Manchester City, por ai mund të kthehet në krye të klubit nëse Conte shkarkohet.
Megjithatë, ish-trajneri i Tottenhamit, Harry Redknapp ka deklaruar se ai do të ishte i interesuar për një rikthim në ish-klubin e tij.
Duke folur për “talkSPORT”, Redknapp tha: “Nëse dikush ju pyet, mendoj se do të ishte e vështirë të thosha jo, do të jem i sinqertë. Kur e doni, e keni të vështirë të thoni jo”.
76-vjeçari tha se nuk ka qenë në kontakt me Levyn për një rikthim të mundshëm.
“Jo, definitivisht jo, kjo nuk ka ndodhur”, tha ai.
“Por ju shikoni se çfarë jeni duke bërë tani, ulur përreth, duke luajtur një lojë golfi, dhe nuk janë paratë, është sfida, ju e doni atë, zhurma e saj, të fitosh një lojë është një ndjenjë fantastike. Është e vështirë të thuash jo”, tha më tej Redknapp.
Ai zbuloi se do të donte të kthehej në një rol përkrah Mason, pasi Redknapp beson se ai mund ta ndihmojë 31-vjeçarin deri në fund të sezonit.
“Po sigurisht, do të më pëlqente shumë. Me një trajner të ri shpesh mendoj se ata nuk përdorin figura më të vjetra, por mendoj se ka vend që të moshuarit të shkojnë me ta dhe të punojnë me një trajner të ri, edhe nëse do të ishte vetëm për disa ditë në javë, vetëm për të qenë përreth”, tha Redknapp.
Ish-trajneri i Portsmouth, Redknapp kaloi katër vite të suksesshme me Tottenhamin mes vitit 2008 dhe 2012, duke regjistruar 98 fitore në 198 ndeshje në Londër. Ai gjithashtu udhëhoqi Tottenhamin edhe në Ligën e Kampionëve.
