Vepra virale e artit e Maurizio Cattelan që përfshin një banane të ngjitur në mur është shitur në ankand për 5.2 milionë dollarë.
Një nga tre botimet për veprën e vitit 2019, i titulluar “Comedian”, bëri debutimin e saj në ankand të mërkurën në mbrëmje në Sotheby’s New York, si pjesë e artit bashkëkohor.
Bëhet e ditur se ofertimi filloi me 800,000 dollarë amerikanë dhe shpejt u hodh përtej vlerësimeve fillestare, pasi ofertat fluturuan shpejt brenda dhomës si dhe përmes telefonit dhe online, shkruan the Guardian, përcjell Telegrafi.
“Nuk e kam menduar kurrë se do të thosha 5 milionë dollarë për një banane”, tha drejtuesi i ankandit Oliver Barker ndërsa oferta i afrohej kulmit.
Jen Hua nga zyra e Sotheby’s në Kinë vendosi ofertën fituese në emër të sipërmarrësit të kriptove me origjinë kineze, Justin Sun, i cili do të paguajë 6.2 milionë dollarë.
Në këmbim, Sun do të marrë një banane dhe një shirit ngjitës, si dhe një certifikatë autenticiteti dhe udhëzime se si të instalohet vepra – duke përfshirë mënyrën e zëvendësimit të bananes.
“Kjo nuk është thjesht një vepër arti, ajo përfaqëson një fenomen kulturor që lidh botën e artit, memeve dhe komunitetit të kriptomonedhave”, tha Sun në një deklaratë për Sotheby’s.
Sun tha se ka në plan të hajë bananen, si një mënyrë për të “nderuar vendin e saj si në historinë e artit ashtu edhe në kulturën popullore”.
