Në ato që njihen si “swing states” Kamala Harris dhe Donald Trump janë pothuajse të barabartë, me asnjërin që nuk udhëheq me më shumë se një pikë përqindje. Pra, nuk kanë një avantazh të qartë në mjaft shtete për të siguruar 270 votat elektorale të nevojshme për të fituar.
Rrugët drejt Shtëpisë së Bardhë për Harris dhe Trump
Presidenti aktual, Joe Biden, fitoi gjashtë nga shtatë shtetet kyçe në zgjedhjet e kaluara. Për Harris, kjo do ta vendoste në një rrugë të thjeshtë për të fituar nëse ajo arrin të ruajë atë që njihet si “muri blu.” Kjo përfshin shtetet si Pensilvania, Miçigani dhe Uiskonsini. Nëse i fiton këto tre shtete, ajo arrin 270 vota elektorale dhe siguron presidencën.
Megjithatë, Harris ka edhe mundësi të tjera nëse ajo humb një pjesë të murit blu. Ajo mund të mbajë Nevadan dhe Arizonën, të ruajë Xhorxhian dhe të përmbysë Karolinën e Veriut. Kjo rrugë gjithashtu e çon në 270 vota dhe e dërgon në Shtëpinë e Bardhë.
Për Donald Trump, harta duket pak më ndryshe:
Rruga më e thjeshtë për Trump është të fitojë në Pensilvani, Karolinën e Veriut dhe Xhorxhia. Me këto fitore, ai do të arrijë votat e nevojshme për të shkuar në 270.
Por, nëse ai humb Pensilvaninë, rruga e tij bëhet më sfiduese. Ai do të duhet të gjejë një mënyrë tjetër për të thyer murin blu dhe të përmbysë një nga këto shtete që zakonisht votojnë për Demokratët. Nëse ai mund të fitojë Miçiganin dhe Uiskonsinin, do të arrijë 270 vota elektorale.
Nëse nuk mund të fitojë të dyja, Miçiganin dhe Uiskonsinin, Trump ka ende një rrugë të ngushtë: ai mund të fitojë Arizonën dhe Nevadan, së bashku me Miçiganin, për të arritur votat e nevojshme. Por nëse ai arrin të marrë vetëm Uiskonsinin nga muri blu, atëherë Arizona bëhet vendimtare, pasi ato 11 vota elektorale mund ta rrisin ose ta prishin mundësinë e tij.
Pra, Harris ka disa rrugë për të arritur fitoren, ku më e lehta është të ruajë murin blu ose të fitojë një kombinim shtetesh duke përfshirë Nevadan, Arizonën, Xhorxhian dhe Karolinën e Veriut.
Trump ka një rrugë të thjeshtë nëse fiton Pensilvaninë, Karolinën e Veriut dhe Xhorxhian, por do të duhet të përmbysë shtete shtesë nëse humb Pensilvaninë.
Meqenëse kemi të bëjmë me një garë të ngushtë në shtatë shtetet kryesore të betejës elektorale, kjo do të thotë se në natën e zgjedhjeve, raportimet nuk do të jetë domosdoshmërisht se kush po kryeson, por sesa e ngushtë mund
të jetë diferenca dhe sa kohë mund të zgjasë për të shpallur një fitues përfundimtar.
Shteti i parë ku do të mbyllen votimet është Xhorxhia, e ndjekur nga Karolina e Veriut. Duke qenë se shumica e votuesve në këto shtete kanë votuar paraprakisht, pritet që rezultatet e hershme të jenë në dispozicion relativisht shpejt pas mbylljes së votimeve.
Deri në mesnatë, pjesa më e madhe e votave në Xhorxhia dhe Karolinën e Veriut pritet të numërohen. Këto rezultate do të jenë treguesit e parë kryesorë, duke na dhënë një ide të hershme nëse do të jetë një betejë e ngushtë apo nëse po shfaqen shenja për një rezultat më vendimtar.
Nëse Harris krijon një avantazh në Xhorxhia ose Karolinën e Veriut, ajo do të ketë disa rrugë të mundshme për të arritur 270 votat elektorale të nevojshme për të fituar presidencën. Kjo do të ushtronte presion të madh mbi Trump, pasi mundësitë e tij për fitore do të ngushtoheshin. Nga ana tjetër, nëse Trump kryeson në këto shtete ose nëse diferencat mbeten të ngushta, nata mund të varet nga tre shtetet kyçe të “Murit Blu”: Pensilvania, Miçigani dhe Uiskonsini. /Nacionale/
