Danimarka po shpreson që Christian Eriksen do të kalojë një shqetësim stomaku para përballjes në raundin e 16-të të “EURO 2024” kundër Gjermanisë.
Eriksen nuk mori pjesë në stërvitjen e të premtes për shkak se u ndje keq që kur u zgjua dhe iu kërkua të mbante distancë nga pjesa tjetër e ekipit për të parandaluar përhapjen e virusit.
Mediumi skandinav “NRK” madje raportoi se Federata Daneze e Futbollit bëri dispozita të veçanta që mesfushori i Manchester United të udhëtonte në mënyrë të ndarë me makinë për përballjen me Gjermaninë në Dortmund.
Pavarësisht një sezoni të dobët në klub që e dërgoi në një rol të rezervistit, statusi i Eriksenit si një nga lojtarët më të rëndësishëm të Danimarkës po shfaqet ende edhe në “EURO 2024”.
Ai shënoi golin hapës të turneut për vendin e tij – tre vjet pas një arresti kardiak në “EURO 2020” – dhe ndihmoi Danimarkën të mos pësojë humbje gjatë fazës së grupeve.
Trajneri danez tha: “Christian u zgjua me një shqetësim të vogël në stomak, dhe kemi pasur të njëjtën gjë me Thomas Delaney më herët. Për të qenë të sigurt që nuk do të ndodhë asgjë, iu kërkua të mos stërvitej. Fatmirësisht, ai është duke u ndjerë më mirë. Kështu që, ne presim që ai të rikuperohet shpejt, dhe të jetë gati për [të shtunën]. Kjo është ajo që ne presim.”
Ndeshja mes Danimarkës dhe Gjermanisë – një përsëritje e finales së “EURO ’92”, luhet të shtunën në mbrëmje nga ora 21:00.
Fituesi i kësaj ndeshje do të përballet në çerekfinale kundër Spanjës ose Gjeorgjisë.
