Cher ka vendosur të heqë dorë nga kërkesa për të marrë përgjegjësinë për kujdestarinë e djalit të saj, Elijah Blue Allman.
Këngëtarja 78-vjeçare kishte bërë kërkesën për të marrë kujdesin e pasardhësve të saj nëntë muaj më parë, duke përmendur shqetësimet e supozuara për abuzimin me substanca nga ana e tij.
Megjithatë, dyshja tani kanë arritur një marrëveshje private dhe janë të angazhuar në “rindërtimin e lidhjes së tyre familjare.”
Në një deklaratë të lëshuar nga avokatët e Elijah, Avi Levy dhe Steven Brumer, thuhet: “Ekipi e mbrojti Elijah me sukses, duke rezultuar në tërheqjen vullnetarë të Cher-it. Ky rezultat i lejon palët të përqendrohen në shërimin dhe rindërtimin e lidhjes së tyre familjare, një proces që ka filluar gjatë ndërmjetësimit dhe vazhdon edhe sot”.
As Cher dhe as djali i saj 48-vjeçar nuk ishin të pranishëm në seancën gjyqësore të premten. Megjithatë, avokatja e Cher, Gabrielle Vidal, ka deklaruar se ata “e kishin zgjidhur privatisht këtë çështje” dhe se këngëtarja dëshironte të tërhiqte kërkesën e saj pa armiqësi. Ajo gjithashtu ka theksuar se Cher mund të paraqesë përsëri kërkesën nëse është e nevojshme në të ardhmen.
Cher kishte pretenduar më parë se kujdestaria ishte “e nevojshme urgjentisht” për shkak të frikës se djali i saj nuk do të ishte gjallë brenda vitit. Avokatët e yllit të “Mermaids” kishin cituar trajtimin e Elijah për çrregullimin skizoafektiv.
Një gjykatës vendosi ta hidhte poshtë çështjen pasi Elijah kishte dëshmuar se kishte menaxhuar financat e tij, kishte një apartament dhe kishte përfunduar një periudhë pa përdorim të narkotikëve, duke dorëzuar teste negative për drogë gjatë procesit.
