Mesfushori i Manchester Unitedit Casemiro do ta mirëpriste duar hapur një transferim në Ligën Saudite gjatë afatit të janarit.
Braziliani që disa muaj është i lidhur me largimin nga “Old Trafford”, ndërsa e ka humbur pozitën edhe nën urdhrat e trajnerit të ri Ruben Amorim.
Sipas gazetës braziliane “UOL”, Casemiro nuk është i kënaqur me mënyrën si po funksionon klubi anglez dhe do ta mirëpriste largimin qysh në afatin e janarit.
Ai verën e kaluar ishte i lidhur me klubet arabe, ndërsa mbetet për t’u parë nëse ndonjë nga klubet si Al Hilal, Al Nassr, Al Ittihad dhe Al Ahli do të bëjnë ofertë për Casemiron.
Casemiro është ndër lojtarët më të paguar te Unitedi, prandaj edhe gjiganti anglez nuk do t’ia vështirësonte largimin, përkundrazi do të negocionte për ta mbyllur marrëveshjen sa më parë.
32-vjeçari këtë sezon ka zhvilluar 14 paraqitje në Premierligë, duke kontribuar me një gol në proces.
