Mark Carney dhe Partia Liberale kanë shënuar një fitore të jashtëzakonshme në zgjedhjet e përgjithshme në Kanada, duke përmbysur pritshmëritë dhe trendin global të humbjeve të qeverive ekzistuese.
Fitorja e liberalëve erdhi në një kohë kur ofendimet e vazhdueshme të presidentit amerikan Donald Trump ndaj Kanadasë dhe talljet për ta bërë atë “shtetin e 51-të të SHBA-së” kishin ngjallur ndjenja të forta patriotike tek votuesit kanadezë.
Kjo ndihmoi në mobilizimin e mbështetjes për Carney-n dhe partinë e tij.
Deri pak muaj më parë, Partia Konservatore e udhëhequr nga Pierre Poilievre kryesonte bindshëm në sondazhe, duke përfituar nga pakënaqësia me gjendjen ekonomike dhe lodhja pas një dekade qeverisjeje liberale nën Justin Trudeau.
Mirëpo, pas dorëheqjes së Trudeau-s, liberalët zgjodhën në krye një figurë të re: ish-kreun e Bankës së Anglisë, Mark Carney, raporton BBC.
Gjatë fushatës, Carney i kundërvihej drejtpërdrejt ndikimit të Trump-it, duke e paraqitur atë si një kërcënim serioz jo vetëm për ekonominë kanadeze, por edhe për sovranitetin e vendit.
Pas fitores, Carney theksoi vendosmërinë e tij me një deklaratë të fortë: “Trump nuk do të na thyejë kurrë.”
Në një vit ku shumë qeveri në botë – nga SHBA-ja te Britania e Madhe, Gjermania, Japonia dhe India – kanë humbur zgjedhjet ose mbështetjen popullore, Kanadaja theu këtë prirje me një përmbysje të fuqishme në favor të liberalëve.
