Eugen Cakolli nga Instituti i Kosovës për Drejtësi ka reaguar pas takimit të sotëm mes liderëve politikë, duke e cilësuar si të rrezikuar shansin e fundit për kthimin e situatës në binarë kushtetues, të ofruar nga Gjykata Kushtetuese.
Sipas Cakollit, afati 30-ditor i përcaktuar nga Kushtetuesja, që skadon më 26 korrik, është një vijë ndarëse kushtetuese dhe jo një hapësirë për manovrim politik.
Postimi i plotë:
Shansi i ofruar nga Gjykata Kushtetuese, që politika të kthehet në binarë kushtetues – më së largu deri më 26 korrik – pas takimit të sotëm “konsultativ”, duket se po digjet.
Kjo, në radhë të parë, për shkak të mungesës së vullnetit për kompromis politik, e së dyti, për shkak të insistimit në taktika bllokimi kundërkushtetuese.
Afati 30-ditor është një vijë ndarëse kushtetuese. Diskutimet për “çka ndodh pas 30 ditëve” janë pjesë e devijimit – sepse pyetja e vetme që duhet të shtrohet është “çka duhet të ndodhë brenda 30 ditëve?”.
Çdo diskutim tjetër është tentativë për ta relativizuar shkeljen dhe përgjegjësinë, si dhe për ta normalizuar krizën.
