Vullnet Bugaqku nga Instituti Demokratik i Kosovës ka reaguar pas vendimit të Lëvizjes Vetëvendosje për ta shpallur të përmbyllur seancën konstitutive të Kuvendit.
Përmes një postimi, përfaqësuesi i IDK-së, Vullnet Bugaqku, ka thënë se ajo që ndodhi sot nuk është vetëm shkelje e rregullave dhe parimeve kushtetuese, por edhe një akt që e poshtëron Kuvendin e Kosovës.
“Ajo që ndodhi sot në Kuvendin e Kosovës nuk është vetëm shkelje e rregullave dhe parimeve kushtetuese, por edhe një veprim që e poshtëron institucionin e Kuvendit, duke e shndërruar atë në një “sërrnishtë”, ku secili mund të shkelë dhe të djegë sipas qejfit.
Me sjelljen e tij, kryetari i Kuvendit jo vetëm që po i keqinterpreton procedurat kushtetuese, por edhe po e trajton institucionin më të lartë përfaqësues të qytetarëve si një hapësirë të pavlerë, të përbuzur dhe të nëpërkëmbur.” – shkroi ai.
Sipas tij, procesi i zgjedhjes së nënkryetarëve nga komunitetet duhet të rikthehet në binarët e kushtetutshmërisë, duke u përsëritur procedurat e propozimit dhe të votimit në pako për dy kandidatët e komuniteteve, siç e përcakton Kushtetuta dhe rregullorja e Kuvendit.
“Procesi i zgjedhjes së nënkryetarëve nga komunitetet duhet të kthehet në binarët e kushtetutshmërisë, përmes përsëritjes së procedurave të propozimit dhe të votimit në pako për dy kandidatët e komuniteteve.” – shkroi Bugaqku.
