Faturat e energjisë elektrike edhe në korrik u erdhën më të shtrenjta. Disa prej bizneseve të mëdha në vend të cilat kanë dalë në treg të lirë të energjisë elektrike, thonë se faturat e korrikut i erdhën për 100% më të larta krahasuar me periudhën e njëjtë të vitit të kaluar.
Nga 42 mijë euro sa kishte paguar për korrikun e vitit të kaluar, Shaqir Palushi pretendon se shpenzimet e energjisë elektrike në korrik të këtij viti i shkuan në 94 mijë euro.
“Kemi pranuar faturën për muajin korrik nga KEK-u dhe fatura ka vlerë 93.799, nga 42.000 sa ishte korrikun e 2024-s. Në qershor të vitit 2025 ishte 64.000, në qershor të 2024-s ishte 34.000”, ka thënë Palushi.
Ndërsa, Ramiz Kelmendi pronar i një biznesi tjetër, thotë se nga 2 milionë euro, parashihet që faturat e energjisë elektrike në vit t’u vinë 6 milionë euro.
Së paku për trefish më të larta pretendohet se u erdhën faturat e korrikut edhe një pjese të bizneseve prodhuese në vend.
Kushtrim Ajvazi, Shoqata e Prodhuesve Vendor tha se çmimi për megavat është kalkuluar 200 deri 203 euro.
Sipas Ajvazit, për shkak të kostos së lartë të energjisë elektrike një pjesë e kompanive janë mbyllur, e një pjesë tjetër kanë paralajmëruar ngritje të çmimeve.
Nga Dhoma e Tregtisë dhe Industrisë kanë paralajmëruar se një pjesë e bizneseve do të zhvendosen në shtete te tjera, për shkak të kushteve më të favorshme.
Nga Zyra e Rregullatorit për Energji ditë më parë kanë thënë se që nga 2017-ta kanë ndërmarrë veprime për krijimin e kushteve për liberalizimin e tregut. /RTK/
