Profesori Nuri Bexheti, ka thënë se zgjedhja e kryeministrit shqiptar, Talat Xhaferi, është nder për shqiptarët.
Në emisionin “Debat Plus”, në RTV Dukagjini, Bexheti tha se kryeministri i sapozgjedhur dje nuk bëri asnjë krekosje, madje u deklarua në dy gjuhë.
Ai thotë se Talat Xhaferi u tregua i matur.
“I kemi hyrë në hak të tjerëve për këtë kontributin… e falënderoj Aleancën për Shqiptarët, Taravarin e cila ndonëse modeste me deputetët e saj tregoi një qytetari, një pjekuri të madhe dhe e kuptuan që zgjedhja e një kryeministri shqiptar është nder për shqiptarët por edhe i bën nder Republikës së Maqedonisë. Kryeministri i sapozgjedhur dje nuk bëri asnjë krekosje, asnjë deklaratë të pamatur, iu drejtua opinionit publik në dy gjuhë, dhe i kënaqi shpirtrat e të gjithë qytetarët e Republikës së Maqedonisë. Vendi është i vogël, banorë nuk ka shumë, gjysma e popullsisë ka gjuhë tjetër, me pakica tjera dhe regjion tjetër, kjo realitet historik dhe real, si rezultat i këtij diversiteti të madh ka dalë edhe ai kryeministër”, tha Bexheti.
“Bashkimi Demokratik ka arsye të jetë i lumtur sepse ndryshimet rrënjësore në Maqedoninë e Veriut kanë ndodhur gjatë qeverisjes së Bashkimit Demokratik për integrim…”, shtoi më tej ai.
