Drenica sot është në zi pas ndarjes nga jeta të Haxhi Thaçit, babait të ish-presidentit Hashim Thaçi. Lajmin e ka bërë të ditur Betim Gjoshi, sekretari organizativ i Partisë Demokratike të Kosovës, i cili ka ndarë një mesazh prekës për jetën dhe luftën e fundit të Bacës Haxhi.
“Jetoi në lëngatë e luftoi me vdekjen edhe një ditë më shumë, jo për vete, por për të parë edhe një herë djalin e tij, për ta përqafuar fort, si dikur, para se t’ia falte jetën Kosovës,” shkruan Gjoshi.
Postimi i plotë:
Jetoi në lengatë e luftoi me vdekjen për edhe ni ditë ma shumë, veç pak kohë ma tepër, jo për vete, po me e pa edhe niher djalin e vet, me e përqafu fort, si dikur, para se me ia falë Kosovës. Amanetin e mbramë me ia lanë – e mandej, u preh në paqe – lehtësisht.
Megjithatë, Baca Haxhi u nda nga kjo botë me dy mërzi të mëdha në zemër: çfarë po ndodh me Kosovën dhe çfarë po ndodh me Hashimin dhe bashkëluftëtarët e tij?
Megjithatë, ai shkoi në amshim krenar për birin e tij, Hashim Thaçin, njeriun që udhëhoqi një epokë dhe bëri histori.
Veç pak ditë para pranverës që po e presim, u shua burri i Drenicës, babai i njeriut që pa në sy lirinë e Kosovës dhe përqafoi të birin, i cili po zhvillon betejën e fundit për Kosovën– një betejë që do ta fitojë!
Haxhi Thaçi e mbylli kapitullin e jetës me dinjitet dhe krenari.
Ngushëllime të sinqerta familjes Thaçi, farefisit, miqve dhe gjithë atyre që ndanë rrugëtimin me të!
Lamtumirë, Haxhi Thaçi!
