Presidenti i Shqipërisë, Bajram Begaj u takua në Kalabri me zëvendëskryetarin e Këshillit të Ministrave dhe ministrin e Punëve të Jashtme të Italisë, Antonio Tajani.
Gjatë takimit Begaj ritheksoi se Italia mbetet partneri i pazëvendësueshëm strategjik për Shqipërinë, bazuar në historinë e shkëlqyer të miqësisë dhe të marrëdhënieve politike, ekonomike e socialo-kulturore, shkruan abcnews.al.
Begaj e falenderoi Tajanin për mbështetjen që Italia i jep zgjerimit të BE-së në Ballkan si dhe konfirmoi angazhimin dhe përkushtimin e palëkundur të Shqipërisë për integrimin në Bashkimin Evropian.
Kreu i shtetit e siguroi Tajanin për vendosmërinë e Shqipërisë për të thelluar dhe pasuruar edhe më tej bashkëpunimin në organizatat ndërkombëtare dhe për çështje me rëndësi rajonale dhe globale.
