Në vitet e 90-ta, fshati Cahan i Shqipërisë, ishte shndërruar në bazë kryesore të Ushtrisë Çlirimtare të Kosovës. Këtu trajnoheshin qindra ushtarë të cilët më pas niseshin për Kosovë. Objekti që shërbeu si bazë e UÇK-së, është akoma në këtë fshat, ndërsa banorët thonë se u hetua hollësisht edhe nga Gjykata Speciale.

Arben Cahani sot jeton në objektin i cili gjatë luftës në Kosovë ishte baza kryesore e UÇK-së në Has.

Ai ishte njëri nga ata që priti dhe ndihmoi ushtarët, ishte edhe Arben Cahani nga ky fshat.

Ky e ka të freskët kujtimin kur oborri i këtij objekti, mbushej me ushtarë të UÇK-së.

“Vishin ushtarët këtu, u visheshin, u stërviteshin.  Ka qenë Mujë Krasniqi,… Me mundësitë kemi vepru, jemi munduar t’i ndihmojmë sa më shumë. Iu ndihmonim me kafshë, me armatim. Iu tregojshim rrugën, kur plagosej a vrahej najkush, shkonim t’i tërhiqnim”,  tregon Cahani, për Tëvë1

Ndërkohë, shenjat se këtu dikur kishte prezencë ushtarake, janë akoma.

Por, edhe brendësia e këtij objekti, nuk ka ndryshuar shumë.

Në mure ende figuron akronimi më i famshëm tek shqiptarët.

Edhe mjetet që përdoreshin për ushtrime fizike.

E së fundmi në këtë fshat, erdhën edhe disa mysafirë të paftuar.

Arben Cahani thotë se objekti ku tani banon, u bë cak i hetimeve të detajuara nga Dhomat e Specializuara.

“Thonin së këtu kanë qenë burgjet e UÇK-së, po kjo nuk është e vërtetë. Ata e kontrolluan komplet shtëpinë, dhomat. I kanë mat sa metra  është dera, dritarja, dhomat”, ka treguar ai.

E kohën kur në këtë fshat trajnoheshin ushtarët e UÇK-së, e mban në mend edhe Hamit Cahani.

“Komandantët nuk tregojshin se kush është komandantë e kush është ushtarë. Veç me ushtrinë, edhe s’kallxojshin tjetër”, kujton Cahani.

Në këtë fshat, në vitet e 90-ta, ishte edhe komandanti legjendar, Adem Jashari.

Ndërsa pas një qëndrimi dy mujor, nga këtu u nis Brigada 113 e Mujë Krasniqit, që më pas ranë një pritë të forcave serbe në Gorozhup të Pashtrikut.