Barcelona është lidhur me një lëvizje surprizë për sulmuesin e Villarrealit, Karl Etta Eyong, i cili mund të jetë pranë një largimi të vonshëm nga “La Ceramica”.
Sulmuesi kamerunas ka impresionuar në paraqitjet e tij të para me “Nëndetësen e Verdhë”.
21-vjeçari shkëlqeu te Villarreal B sezonin e kaluar, dhe drejt fundit të kampionatit filloi të përdorej si zëvendësues nga trajneri Marcelino Garcia Toral.
Ai gjithashtu shënoi golin vendimtar kundër Gironës që ndihmoi ekipin të sigurojë pjesëmarrjen në Ligën e Kampionëve.
Këtë sezon ka startuar në të dyja ndeshjet nën drejtimin e Marcelinos, duke shënuar në ndeshjen e parë kundër Real Oviedo.
Sipas Sport, Barcelona po konsideron të bëjë një ofertë për Etta Eyong.
Sulmuesi i ri kamerunas ka një klauzolë lirimi prej vetëm 10 milionë eurosh, dhe gazeta katalanase thotë se blaugranasit do të merrnin në konsideratë transferimin e tij dhe huazimin për këtë sezon.
Drejtori sportiv Deco e sheh atë si një talent premtues me shumë hapësirë për përmirësim dhe një çmim shumë më poshtë vlerës së tij reale në treg.
Qoftë për Barcelonën, apo thjesht për ta blerë dhe shitur më pas me fitim, ata besojnë se ai mund të ketë vlerë.
Nga ana e tij, Etta Eyong thuhet se dëshiron të qëndrojë te Villarreal, por vetëm nëse do të ketë mundësi për të luajtur.
