E ardhmja e Ansu Fati-t te Barcelona duket se po shkon drejt një fundi të parashikueshëm. Sulmuesi 22-vjeçar, i cili ka pasur shumë pak hapësira në këtë sezon me katalanasit (vetëm 298 minuta në 11 ndeshje), mund të jetë duke kaluar muajt e fundit si lojtar i “blaugrana”.
Sipas raportimeve të fundit nga Mundo Deportivo, skuadra e AS Monaco ka shfaqur një interes serioz për të siguruar shërbimet e talentit spanjoll për sezonin e ardhshëm. Klubi nga Principata, që ka siguruar pjesëmarrjen në fazën e grupeve të Ligës së Kampionëve pas vendit të tretë në Ligue 1, e sheh Ansu Fati-n si një mundësi interesante në treg.
Trajneri Adi Hütter po kërkon të forcojë repartin ofensiv me lojtarë të rinj dhe premtues, dhe Fati përputhet me profilin që Monaco dëshiron. Drejtori sportiv i Barcelonës, Deco, ka lënë të kuptohet në një intervistë të fundit se klubi nuk do t’i bllokojë rrugën lojtarit për një largim të mundshëm.
Deklaratat e tij sugjerojnë se gjithçka do të varet nga dëshira e vetë Fati-t dhe mundësitë që ai sheh për të ardhmen. Duke marrë parasysh dëmtimet e shumta dhe huazimin e pafrytshëm te Brighton në Premier League, largimi i tij shihet edhe si një mundësi për të ulur barrën financiare të pagave dhe për të liruar hapësira në skuadër.
Monaco tashmë ka nisur lëvizjet fillestare për të avancuar në këtë pistë dhe është e gatshme të paraqesë një ofertë që mund të bindë si Barcelonën, ashtu edhe vetë lojtarin.
