Barcelona ka shënuar fitore bindëse në udhëtim te Real Madridi, në kuadër të kryederbit së xhiros të 11-të në La Liga.
Katalunasit ishin të hatashëm në “El Clasico” duke triumfuar me rezultat 0:4.
Pjesa e parë përfundoi ashtu siç nisi ngase asnjëra skuadër s’i finalizoi rastet. Kylian Mbappe në fakt shënoi mirëpo u anulua për pozitë jashtë loje.
Vlen të ceket se francezi për vetëm 30 minuta lojë, ra plot gjashtë herë në “grackën” e pozitës jashtë loje që e ndërtoi Barcelona.
Barcelona pastaj ishte e pandalshme në pjesën e dytë, duke shënuar plot katër gola në 45 minuta. Fillimisht Casado asistoi për mrekulli te Robert Lewandowski, i cili kaloi mysafirët në epërsi (54’).
Vetëm dy minuta më vonë, polaku mori një harkim nga Balde dhe me një goditje precize e dyfishoi epërsinë (56’).
I njëjti dominim vazhdoi edhe në minutat e mbetur, me Lamine Yamal që u përkujdes për golin e tretë pas asistimit të Raphinhas (77’).
Fitoren pastaj e vulosi vetë Raphinha, që ia vodhi topin Vazquezit dhe me një parabolë e mbylli çështjen e fituesit (84’).
Me këtë triumf, Barcelona tani është lider i vetëm në La Liga me 30 pikë, gjashtë mbi Real Madridin.
