Ballkani po vazhdon me formën e lartë në garat evropiane, teksa sonte e fitoi përballjen e parë ndaj BATE Borisovit, në kuadër të fazës së “Play-Off”-it në Ligën e Konferencës.
Skuadra e drejtuar nga Ilir Daja triumfoi me rezultatin 4:1. Ndeshja u zhvillua në stadiumin “Fadil Vokrri”.
Kampioni i Kosovës e nisi më mirë ndeshjen, por ishin mysafirët që kaluan të parët në epërsi përmes Denis Laptev, i cili shënoi në minutën e dhjetë.
Ballkani nuk e ndali presionin dhe krijoi raste për të shënuar, por golin e barazimit e gjeti në minutën e 31-të.
Ishte Bajram Jashanica që shënoi me kokë pas një harkimi nga këndi të Lorenc Trashit.
Baras u mbyll pjesa e parë, teksa suharekasit vazhduan me ritëm të lartë edhe në pjesën e dytë, të cilën e dominuan në tërësi.
Përforicimi i kësaj vere, Bleart Tolaj, ishte ai që “shpërtheu” duke shënuar golat e parë me fanellën e Ballkanit.
Tolaj shënoi fillimisht me kokë në minutën e 58-të pas harkimit të Armend Thaqit. Edhe në minutën e 66-të ishte Tolaj që iu përgjigj më së miri një harkimi të Thaqit.
Armend Thaqi në fund e vulosi fitoren e “portokallezinjve” me një gol të shënuar nga distanca. Goditja e tij më shumë ishtë në formë harkimi, por që përfundoi pastaj në rrjetë pasi nuk u devijua nga askush.
Ndeshja e kthimit do të zhvillohet pas një jave në Budapest. Skuadra fituese do të sigurojë pjesëmarrjen në grupet e Ligës së Konferencës.
Ballkani këtë arritje e kishte regjistruar vitin e kaluar dhe tani duket shumë afër për ta përsëritur këtë sukses. /Express/
