FC Ballkani sonte në Bullgari do të luajë njërën ndër ndeshjet më të rëndësishme në historinë e tyre.
Skuadra nga Suhareka do të përballet me Ludogorets në ndeshjen kthyese kualifikuese në Ligën e Kampionëve.
Skuadra e Ilir Dajës në duelin e sontëm hyn me avantazhin prej 2-0, të arritur një javë më parë në Prishtinë.
Ballkani dje ka zbarkuar në Bullgari dhe tashmë është gati për duelin e sotëm kundër skuadrës më të fortë në Bullgari.
Kampionët në fuqi të Kosovës, synojnë të marrin rezultat të favorshëm për të kaluar në rrethin e dytë në kualifikueset e ‘Championsit’ e që do të ishte arritja më e madhe në historinë e klubit nga Suhareka.
Trajneri i skuadrës kosovare, Ilir Daja është shprehur optimist se të besuarit e tij, do të bëjnë paraqitje të mirë edhe në duelin e sontëm, ashtu siç bën edhe sfidën e parë.
“Ata bëjnë një futboll fantastik në sensin taktik. Prandaj edhe e kemi analizuar mirë. Ne nuk do të mbrohemi edhe pse kemi fituar 2:0. Do të punojmë edhe në fazën e mbrojtjes edhe sulmit, pasi mendojmë se Ludogoretsi do ta filloj më furishëm takimin për shkak se është minus dy gola. Do ta bëjmë mbrojtjen, por ashtu siç e kemi bërë në Prishtinë”, është shprehur Daja.
Ndeshja Ludogorets-Ballkani fillon në orën 20:00
