Deputeti i LVV-së, Mefail Bajqinovci, ka reaguar ndaj deklaratës së kryetarit të LDK-së, Lumir Abdixhikut, i cili ka thënë se ekzekutivi i vendit i drejtuar nga LVV-ja sulmon të tjerët dhe punët ia kryen LDK-ja.
Në një postim në Facebook, Bajqinovci ka pohuar se derisa Abdixhiku flet për renovim të kryeqytetit, aty fëmijët sulmohen nga qentë endacakë, si dhe ka pohuar se për Komunën e Prishtinës çdo ditë raportohet për keqpërdorime dhe skandale
“Lumiri thotë se ne po renovojmë në kryeqytet. Nën qeverisjen e LDK-së, sot në Prishtinë fëmijët nuk guxojnë të shkojnë në shkolla fillore pa prindër sepse qentë endacak i sulmojnë. Mbi 600 sulme të qenve endacakë kanë ndodhur në kryeqytet në 6 muajt e fundit”.
“Kur më shumë papastërti nuk ka pasur Prishtina – mbeturinat e kanë mbuluar kryeqytetin. Bllokimi i rrugëve ka shkaktuar kaos në trafik. Skandalet dhe keqpërdorimet i shohim çdo ditë në media për komunën e Prishtinës. Mos te harrojmë ‘arkitektin e qytetit’. Dhe për fund, çdo vit në Prishtinë, LDK-së i teprojnë mbi 50 milionë euro. Ky është ‘renovimi’ i LDK-së”, ka thënë Bajqinovci.
