Anëtari i kryesisë së Lidhjes Demokratike të Kosovës dhe ish-kryeministri, Avdullah Hoti, ka shpallur zyrtarisht kandidaturën e tij për postin e kryetarit të kësaj partie. Vendimi, siç bën të ditur Hoti, vjen pas dorëheqjes së kryetarit aktual, Lumir Abdixhiku, si pasojë e rezultatit të fundit zgjedhor.
Në një njoftim drejtuar strukturave dhe anëtarësisë së gjerë të partisë, Hoti konfirmoi se do të kërkojë besimin e delegatëve në mbledhjen e Kuvendit të LDK-së, e cila është caktuar të mbahet më 31 janar 2026.
Hoti e cilësoi këtë periudhë si një “moment vendimtar” për partinë më të vjetër në vend dhe për Kosovën, duke u zotuar se do të marrë përsipër barrën e ringritjes politike dhe organizative të LDK-së.
“Pas dorëheqjes së Kryetarit Abdixhiku për shkak të rezultatit të fundit zgjedhor, ju njoftoj se në mbledhjen e Kuvendit të LDK-së të datës 31 janar 2026 do të kërkoj besimin tuaj për t’i prirë Lidhjes Demokratike të Kosovës.
Me këtë rast, falënderoj të gjitha strukturat drejtuese të LDK-së për përkushtimin në udhëheqjen e LDK-së në pesë vitet e fundit: Kryetarin Abdixhiku, kolegët e Kryesisë, të degëve e nëndegëve dhe forumet anekënd Kosovës. Mirënjohja ime e thellë shkon, para së gjithash, për anëtarësinë besnike të LDK-së — shtyllën mbi të cilën kjo parti ka qëndruar dhe do të qëndrojë gjithmonë.
“Në këtë moment vendimtar për LDK-në dhe për Kosovën, unë zotohem me përgjegjësi të plotë të marr barrën e ringritjes politike dhe organizative të partisë. Zotohem të udhëheq një proces tërësisht gjithëpërfshirës, transparent dhe në përputhje të plotë me Statutin, ku secili anëtar, çdo degë dhe çdo forum ka zë dhe rol aktiv në ringritjen e LDK-së dhe në vendimet që marrim si shtëpi politike e demokracisë. – shkroi Hoti.
Hoti shkroi se vizioni i tij për LDK-në bazohet në meritokraci dhe hapje, duke garantuar se nën udhëheqjen e tij askush nuk do të mbetet “në margjina”.
Ai premtoi një platformë ku profesionistët, gratë dhe të rinjtë do të kenë hapësirën e merituar, duke bashkuar energjinë e re me përvojën politike.
“Zotohem se askush nuk do të mbetet në margjina. Se do të ndërtojmë një LDK të hapur, të drejtë dhe konkurruese. Një LDK ku avancimi bazohet në meritë, integritet dhe përkushtim; ku profesionistët, gratë dhe të rinjtë e gjejnë hapësirën që u takon; dhe ku energjia e re bashkohet me përvojën për ta kthyer LDK-në në alternativën kryesore qeverisëse të Republikës së Kosovës.
Jam thellësisht i bindur se potenciali i LDK-së është shumë më i madh. Është koha që këtë potencial ta çlirojmë dhe ta kanalizojmë për ta kthyer LDK-në në forcën politike kryesore në Republikën e Kosovës, në shërbim të qytetarëve dhe të interesit shtetëror.
Të gjithë së bashku do t’i rikthejmë dhe forcojmë vlerat tona themeltare: demokracinë e brendshme, guximin politik për të marrë përgjegjësi, vizionin shtetformues dhe orientimin e palëkundur euro-atlantik. Këto vlera nuk janë kujtim i një të kaluare të lavdishme — ato janë të domosdoshme për të ardhmen tonë. Vetëm duke u kthyer tek to, me vendosmëri dhe unitet, do ta rikthejmë LDK-në në ballë të proceseve demokratike dhe shtetërore të Republikës së Kosovës.
Ky është momenti për bashkim. Për maturi. Për guxim politik. Për një fillim të ri që ndërtohet mbi parime, besim dhe vizion.
Zoti e bekoftë Lidhjen Demokratike të Kosovës!
Zoti e bekoftë Republikën e Kosovës!”
