Agjencia e Statistikave të Kosovës ka publikuar raportin për Indeksin e Kostos së Ndërtimit për tremujorin e dytë të vitit 2025, ku theksohet një rritje e dukshme e kostove krahasuar si me tremujorin paraprak, ashtu edhe me periudhën e njëjtë të vitit të kaluar.
Sipas të dhënave, Indeksi i përgjithshëm i Kostos së Ndërtimit në Kosovë është rritur për 0,7% në TM2 2025, krahasuar me TM1 2025. Kontributin më të madh në këtë rritje e dhanë energjia me 5,5%, pagat me 2,0%, transporti me 1,8%, kostot e tjera me 1,3%, makineritë me 1,0% dhe materialet me 0,3%.
Në krahasim me të njëjtën periudhë të vitit 2024, rritja është edhe më e theksuar. Indeksi i Kostos së Ndërtimit u rrit për 4,0% në TM2 2025 kundrejt TM2 2024. Faktorët që ndikuan më shumë në këtë rritje ishin energjia me një rritje prej 26,9%, pagat me 6,7%, kostot e tjera me 3,7%, materialet me 3,5%, transporti me 3,4% dhe makineritë me 0,7%.
Pas një kulmi të rritjes vjetore në TM1 2025 (+6,5%), ritmi u ngadalësua në TM2 2025 (+4,0%). Për vitin 2024, mesatarja vjetore e IKN-së ishte 144,7 me rritje 3,4%.
