Cristiano Ronaldo shmang mbajtjen e telefonit në dhomën e gjumit kur fle, sipas ish-bashkëlojtarit të tij te Portugalia, Cedric Soares.
Sulmuesi i Al-Nassr dhe Portugalisë, Ronaldo, nuk e mban telefonin pranë vetes gjatë gjumit, ka zbuluar Cedric, i cili ka luajtur 25 herë krah tij me kombëtaren.
Cedric ka treguar se pesë herë fituesi i Topit të Artë i ka dhënë këshilla për të qëndruar larg telefonit në orët e gjumit.
Ronaldo, i njohur për kujdesin ekstrem ndaj dietës dhe orarit të gjumit, e merr shumë seriozisht mënyrën si kujdeset për veten për të zgjatur karrierën edhe në moshën 40-vjeçare.
“Ai ndalon përdorimin e celularit në orare të caktuara. Thotë se ndikon në gjumin e tij, ndaj e lë jashtë dhomës së gjumit”.
“Njëherë më tha: ‘Cedric, nuk duhet të përdorësh 5G, sepse ndikon në gjumin tënd.’ Kjo ndodhi kur doli 5G. Nuk e di nëse ende e ndjek këtë praktikë, por e bllokonte sinjalin që të flinte x orë”, ka thënë Cedric për ESPN Brasil.
Edhe pse Ronaldo mund të mos jetë mashtruar nga teoritë konspirative, dezinformimi ishte shumë i përhapur gjatë pandemisë së koronavirusit, kur u pretendua në mënyrë të rreme se 5G dëmton sistemin imunitar dhe se virusi mund të transmetohej përmes rrjeteve 5G.
