Liderët e Premier League, Arsenal, e zgjatën serinë e fitoreve në kampionat në katër ndeshje radhazi me një fitore 1-0 ndaj Crystal Palace në “Emirates Stadium”.
Mysafirët e nisën ndeshjen mirë dhe dukeshin më afër golit të avantazhit, ndërsa “Topçinjtë” u desh pak kohë që të hynin në ritmin e duhur. Skuadra e Oliver Glasner kishte pësuar një humbje tronditëse 1-0 në shtëpi ndaj ekipit qipriot AEK Larnaca në Ligën e Konferencës të enjten, por duket se e kishte lënë pas zhgënjimin për të mbajtur në kontroll liderët e PL gjatë gjysmës së parë të lojës.
Megjithatë, pasi nuk përfituan nga starti i mirë, mysafirët u ndëshkuan nga një fytyrë e njohur. “Shqiponjat” ishin të vetëdijshme për rrezikun që paraqiste Eberechi Eze, ish-lojtari i tyre, dhe frika e tyre u bë realitet gjashtë minuta para fundit të pjesës së parë. Një goditje e lirë në zonë u devijua me kokë nga Gabriel Magalhães drejt pikës së penalltisë, dhe topi i lirë përfundoi te Eze, i cili me një gjuajtje akrobatike e dërgoi topin në rrjetë, duke i dhënë Arsenalit avantazhin në pushim pas vetëm goditjes së dytë drejt portës në gjithë ndeshjen.
Edhe pse djemtë e Mikel Artetës kishin kaluar në epërsi, ata e dinin se kishte vend për përmirësim. Arsenal hyri në pjesën e dytë me më shumë vendosmëri, dhe vetëm pesë minuta pas rifillimit ishin shumë pranë golit të dytë kur krosimi i Declan Rice u godit me kokë nga Gabriel dhe u përplas në traversë. Topi u kthye sërish te Rice, i cili goditi drejt në duart e Dean Henderson, ndërsa pak çaste më vonë Bukayo Saka gjuajti paksa jashtë shtyllës së majtë. Loja sulmuese e Arsenalit u përmirësua dukshëm në pjesën e dytë, ndërsa mbrojtja e tyre – që kishte pësuar vetëm tre gola në kampionat, shifra më e ulët pas tetë ndeshjeve që nga sezoni 1998/99 – nuk i lejoi Palace asnjë mundësi të qartë, duke siguruar fitoren e shtatë në tetë përballjet e fundit direkte me “Eagles”.
Ky rezultat shënon fitoren e pestë radhazi me portën e paprekur për Arsenalin në të gjitha garat, dhe skuadra e Artetës tani ka një epërsi prej katër pikësh ndaj Bournemouth-it që ndodhet në vendin e dytë, duke ruajtur rekordin e pamposhtur në shtëpi këtë sezon. Sa për Crystal Palace, ata tani kanë katër ndeshje pa fitore, por meqë kjo është vetëm humbja e tyre e dytë në kampionat, tifozët mbeten optimistë ndërsa skuadra vazhdon të mbajë një pozicion në pjesën e sipërme të tabelës së Premier League.
