Është arrestuar zyrtari policor i cili dyshohet se shkaktoi aksidentin me fatalitet në rrugën “Ismajl Kryeziu” në Prizren, ku i vdekur mbeti një këmbësor 80-vjeçar.
Inspektorati Policor i Kosovës ka njoftuar mbi rastin e arrestimit të të dyshuarit, derisa shtoi se i njëjti në momentin e aksidentit ka qenë jashtë detyrës zyrtare.
Në vend të ngjarjes kanë dalë hetuesit e IPK-së, njësitë relevante policore dhe prokurori kujdestar nga Prokuroria Themelore në Prizren.
Bazuar në veprimet fillestare hetimore dyshohet se drejtuesi i veturës nuk ka përshtatur shpejtësinë e drejtimit të mjetit me kushtet e rrugës duke shkaktuar aksidentin.
Lidhur me këtë rast është iniciuar rast penal lidhur me veprën penale “Rrezikim i trafikut publik”, kurse ndaj të dyshuarit është caktuar masa e ndalimit për 48 orë.
