Policia e Kosovës ka njoftuar se është arrestuar një 34-vjeçar i cili dyshohet se sulmoi me grusht një person të moshuar në Rrugën C në Prishtinë.
Mediat vendore kanë raportuar dhe transmetuar pamje të një rasti ku një person sulmon një të moshuar në rrugët e kryeqytetit.
Nga pamjet e para shihet se si një person sulmon me grusht një person të moshuar, e pastaj edhe ia godet derën e veturës, përmes së cilës mund të supozojmë se lëndimet kanë qenë serioze.
Policia e Kosovës ka njoftuar pak minuta me vonë se personi i cili shihet teksa e sulmon të moshuarin është arrestuar.
I arrestuari është 34-vjeçar, ndërsa viktima është dërguar për trajtim të nevojshëm mjekësor.
Sipas njoftimit, arrestimi është bërë falë reagimit të shpejtë të njësiteve policore pasi e kanë identifikuar personin e dyshuar.
I arrestuari është dërguar në mbajtje me vendim të prokurorit.
Më poshtë gjeni njoftimin e plotë të Policisë së Kosovës:
Arrestohet personi i dyshuar për sulm fizik në rrugën “C” Prishtinë
Sot rreth orës 18:30, kemi marrë informatën se në rrugën “C” në Prishtinë, një person është sulmuar fizikisht.
Policia menjëherë ka dalë në vendin e ngjarjes.
Bazuar në të dhënat e deritanishme në këtë rast, lëndime trupore ka pësuar një person , i cili është dërguar për trajtimin e nevojshëm mjekësor.
Ka qenë reagimi i shpejtë i njësiteve policore ai që ka mundësuar identifikimin dhe arrestimin e personit të dyshuar.
Personi i dyshuar:
A.M, mashkull, 34 vjeç, me vendim të prokurorit të shtetit është dërguar në mbajtje, ndërkohë që hetuesit policor kanë nisur një hetim lidhur me rrethanat që karakterizojnë këtë rast.
