Kryeshefi i “KRU Gjakova”, Hasan Krasniqi, është arrestuar ditën e sotme në Gjakovë.
Sipas njoftimit, i njëjti dyshohet për “Keqpërdorim i pozitës apo autoritetit zyrtar”.
Ky arrestim vjen pasi disa ditë më parë në media janë publikuar disa audio-incizime në të cilat dëgjohet kryeshefi i KRU “Gjakova”, Hasan Krasniqi, teksa flet për negocim të një kontrate dhe konfirmon përfshirjen e tij në kontaktimin e bizneseve që do të merreshin me servisimin e makinave të ndërmarrjes, si dhe dëgjohet duke thënë se do të zgjedhë kompaninë për të nënshkruar kontratën, për një tender për servisimin e veturave.
Njoftimi i plotë:
Arrestohet një i dyshuar për veprën penale “Keqpërdorim i pozitës apo autoritetit zyrtar”
Prishtinë, 18 mars 2025 – Prokuroria Speciale e Republikës së Kosovës në bashkëpunim me Drejtorinë për Hetimin e Krimeve Ekonomike dhe Korrupsionit, përkatësisht Njësinë Rajonale për Hetimin e Krimeve Ekonomike e Korrupsionit në Gjakovë, kanë realizuar sot një operacion policor në Gjakovë.
Operacioni policor ka rezultuar me arrestimin e një personi H.K., të dyshuar për veprën penale “Keqpërdorim i pozitës apo autoritetit zyrtar” nga neni 414 i KPRK-së, i cili me vendim të prokurorit nga PSRK është ndaluar për 48 orë.
Poashtu gjatë ditës së sotme janë kontrolluar-bastisur edhe objekti i banimit të personit të dyshuar dhe zyra e tij në KRU Gjakovë, ku janë siguruar dëshmi- prova materiale që ndërlidhen me rastin, si dhe janë sekuestruar:
-Një (1) Lap-Top
-Një (1) Telefon mobil Samsung Galaxy S22,
-Para 22.205,00 Euro,
-Barka Ranier Wit,
-Dy kontrata qe ndërlidhen me rastin.
Prokurori i rastit brenda afatit ligjor do të vendosë për masën e sigurisë së pranisë së të pandehurit në procedurë.
