Policia e Kosovës ka arrestuar një person të dyshuar për shpërdorim të pasurisë së huaj në Komunën e Ferizajt.
Sipas njoftimit të policisë, më 18 dhjetor të vitit 2022, rreth orës 19:20 policia e stacionit në Ferizaj kishte pranuar informatë se në rrugën “Sali Çeku” në Ferizaj është një rast i shpërdorimit të pasurisë së huaj.
Në lidhje me këtë, hetuesia e policisë nën autorizimin e prokurorit kujdestar nga Prokuroria Themelore në Ferizaj, kishin ndërmarrë veprimet e nevojshme dhe menjëherë kishin dalë në vendin e ngjarjes duke nisur hetimet.
Pas grumbullimit të informacioneve, më 13 janar të vitit 2023, pas një pune hetimore, policia ka arritur të arrestoje personin e dyshuar me inicialet Sh.L., i moshës 36-vjeçare, i cili pasi kishte marrë në shërbim një veturë ia kishte dhënë në kompensim një personi tjetër për një borxh, i cili është në kërkim policor bashkë me veturën.
“I dyshuari është shoqëruar në stacionin e policisë në Ferizaj dhe pas intervistimit nga policët hetues, me vendim të prokurorit të rastit, është ndaluar në mbajtje për 48 orë për procedura të mëtejme. Rasti është cilësuar “Shpërdorimi i pasurisë së huaj””, thuhet në njoftimin e policisë.
