Gjatë ditës është raportuar se dyshohet se ministrja e Tregtisë dhe Industrisë, Rozeta Hajdari, ka qenë cak i një vjedhjeje. Në mbramje policia ka konfirmuar arrestimin e një gruaje 33-vjeçare me inicialet N.K.
Për arrestimin e saj ka njoftuar zëdhënësja e policisë Rajonale të Prishtinës, Florie Ahmeti.
“Sot nga Njësiti i Hetimeve të Përgjithshme në Prishtinë, është arrestuar një person i dyshuar për një rast vjedhje e rëndë që është raportuar me datën 01.10.2023. Puna e hetuesve policor, është finalizuar sot, ku pas marrjes së disa veprimeve operative kanë arrit që të identifikojnë dhe të arrestojnë të dyshuarën: N.K. femër, 33 vjeçare, shtetase e Republikës së Kosovës”, tha Ahmeti për Express.
E dyshuara me vendim prokurorit të shtetit është dërguar në mbajtje.
“Ndërkohë që hetuesit e stacionit policor po kryejn veprimet e nevojshme hetimore lidhur me rastin”, tha Ahmeti.
Rasti i vjedhjes është bërë i ditur në raportin 24-orësh të Policisë së Kosovës.
“Prishtinë. 01.10.2023 – 08:00. Ankuesja femër kosovare ka informuar se persona të panjohur kanë depërtuar në banesën e saj dhe nga aty kanë kryer vjedhje”, thuhej ndër të tjera në raportin e PK-së.
